- 99 -

1488. Juni 21.

Johannes Anthonius humilis Abbas Monasterij S. Gemini Narniensis dyoc. Sanctissimi domini nostri pape Familiaris et continuus Comensalis, ac eiusdem d. n. Pape et sancte Sedis Appostolice super Indulgencijs et Facultatibus per prefatum Sanctiss. d. n. et prefatam sanctam Sedem pro defensione catholice fidey contra perfidos Turcos, Tartaros et alios infideles christiano nomini Hostes concessis, ad universam Almaniam et Datie, Noruegie et Swetie Regna et alia non nulla loca Commissarius, Nunctius et Collector, Universis et singulis presentes literas inspecturis Salutem in domino. Noveritis quod prefatus Sanctiss. d. n. Innocentius papa octavus, orthodoxe fidei Christiane defensioni et christifidelium animarum saluti, quanto sibi ex alto conceditur, de thezauro militantis Ecclesie qui nuncquam exhauriri potest, cupiens salubriter providere, per suas literas Appostolicas concessit omnibus christifidelibus in locis premissis, qui pro defensione predicta Quatuor, Tres, duos, unum ducatum auri vel tantum quantum cum Commissarijs super hoc deputatis convenerint ac contribuerint et cum effectu persolverint, ut tam ipsi quam quilibet de ipsorum Contribuentium Familia possint sibi ydoneum eligere confessorem, Secularem vel cuiusvis ordinis Regularem, qui confessione sua diligenter audita possit et valeat plenariam Absolutionem omnium peccatorum suorum quantumcunque gravium et enormium, Etiam si talia forent propter que Sedes App. esset quovis modo consulenda, concedere, Criminibus et peccatis Conspirationis in Romanum Pontificem et Sedem App. et iniectionis manuum violentarum in Episcopos et superiores prelatos duntaxat exceptis, Et possit absolvere ab omnibus censuris et penis Ecclesiasticis quibuscunque et quomodocunque a Jure vel ab Homine inflictis semel in vita, et alijs dicte Sedi non reservatis casibus et peccatis Totiens Quotiens id petierint, eis de absolutionis beneficio providere, Et tam in vita quam in mortis articulo plenariam omnium peccatorum suorum remissionem et absolutionem cum ea plenaria Indulgentia, quam etiam consequerentur si visitarent Limina beatorum Appostolorum Petri et Pauli de Vrbe, ac etiam si proficiscerentur ad recuperationem Terre sancte et eorundem infidelium expugnationem, que etiam ad peccata oblita et que alijs alias sacerdotibus confessi forent, extendatur, Ita ut si ipsis in huiusmodi mortis articulo etiam sepius constitutis absolutio ipsa impendatur, Nichilominus iterato in vero mortis articulo possit impendi, et impensa suffragetur eisdem. Et quia dilecte nobis in Christo Margaretha priorissa Conventus Sancti Spiritus deodicatarum virginum in Rathibor una cum ceteris virginibus tanquam proprijs nominibus hic nominatis quas pro expressis volumus hic habere, sue salutis memores volentes dictarum Indulgentiarum gratias consequi, suam contributionem iuxta prefatarum literarum tenorem errogaverunt, Idcirco tenore presentium autoritate appostolica nobis super hoc concessa Committimus omnibus Sacerdotibus per prefatos eligendis, ut eosdem Contribuentes absolvant ut premittitur. Iuxta tenorem prefatarum literarum appostolicarum. Insuper premissa autoritate App. annuimus, concedimus, impartimur et admittimus, vivificum salutisque nostre venerabile sacramentum Sanctissimi Corporischristi in eius Festo et per totam eius octavam singulis diebus ante Missam et ante vesperas cum ea qua decet solennitate, devotione et reverentia cum cereis, luminibus et processione Cantuque tali Festo congruenti Intra Monasterium ipsarum per totum ambitum circuitus, clausis tamen ianuis, defferre propter Indulgentias a Sanctis patribus huiusmodi Festo solenni et eius Octave concessas consequendas et ardentiori devotione optinendas, temporibus perpetuis duraturum. In quorum omnium fidem presentes fieri fecimus nostri quo in talibus utimur Sigilli sub appensione munitas. Datum Rathibor a. d. Mill. quadringent. Octuagesimo Octavo, Die vicesima prima Mensis Junij, Forma absolutionis.
Misereatur tui etc. Dominus noster Ihesus Christus merito sue sanctissime passionis, Dignetur te absolvere, et ego autoritate eiusdem ac beatorum Petri et Pauli appostolorum eius ac Sanctissimi d. n. Pape in hac parte michi commissa et tibi concessa te absolvo ab omnibus Sententijs et vinculis excommunicationis maioris vel minoris, suspensionis et interdicti, ac alijs censuris Ecclesiasticis, si incidisti, ab omnibus quoque peccatis tuis, criminibus, excessibus et delictis quantumcunque gravibus et enormibus, etiam quovismodo Appostolice Sedi reservatis, cum ea plenaria indulgentia, quam etiam consequntur visitantes Limina beatorum appostolorum Petri et Pauli, et proficiscerentur (sic) ad recuperationem Terre sancte, et eorundem infidelium expugnationem, impartiendo tibi plenariam omnium remissionem peccatorum, et restituo te gremio sancte matris Ecclesie et eiusdem sacramentis In nomine Patris et Filij et Spiritussancti Amen.

Mit anhangendem Siegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.